जनकपुर, २८ कात्तिक । धनुषाको धनौजीमा आयोजित वडा स्तरीय क्रिकेट प्रतियोगिता ‘धनौजी प्रिमियर लिग’ (DPL) को उपाधि महुलिया टिमले जितेको छ।
लगान युवा क्लबको आयोजनामा सम्पन्न प्रतियोगिताको फाइनलमा महुलियाले महोत्तरीको देवनमा टिमलाई पराजित गर्दै उपाधि हात पारेको हो।
फाइनलमा टस जितेर पहिले ब्याटिङ गरेको देवनमा टिमले सबै विकेट गुमाउँदै १०९ रन बनाएको थियो। जवाफी ब्याटिङमा उत्रिएको महुलिया टिमले ११० रनको लक्ष्य पूरा गर्दै जित सुनिश्चित गर्यो।
उपाधिसँगै महुलिया टिमले नगद ३५ हजार रुपैयाँ र ट्रफी प्राप्त गरेको छ भने उपविजेता देवनमा टिमले १५ हजार रुपैयाँ र ट्रफीमा चित्त बुझाएको छ।
स्थानीय युवा नेता रोशन मिश्रको प्रमुख आतिथ्यमा प्रतियोगिताको समापन गरिएको थियो। कार्यक्रममा बोल्दै मिश्रले खेलकुदले युवामा अनुशासन, एकता र नेतृत्व क्षमताको विकास गर्नुका साथै स्थानीय प्रतिभालाई पहिचान गर्न सहयोग पुर्याउने बताए।
स्थानीय क्षेत्रमा क्रिकेटको प्रवर्द्धन, युवा खेलाडीको प्रतिभा उजागर तथा खेलकुदप्रतिको आकर्षण बढाउने उद्देश्यले प्रतियोगिता आयोजना गरिएको आयोजकले जनाएको छ।
