काठमाडौं, २६ जेठ । म्याग्दीबाट निर्वाचित स्वतन्त्र सांसद महावीर पुन विज्ञान, प्रविधि तथा नवप्रवर्तन मन्त्री बन्ने सम्भावना बलियो बनेको छ ।
प्रधानमन्त्री कार्यालय अनुसार पुनलाई उक्त मन्त्रालयको जिम्मेवारी दिने तयारी भइरहेको छ । यद्यपि, मन्त्री नियुक्तिको चर्चाबारे प्रतिक्रिया दिँदै पुनले आफूलाई यस विषयमा कुनै औपचारिक जानकारी नआएको बताएका छन् ।
उनले सञ्चारकर्मीसँग कुरा गर्दै मन्त्री नियुक्तिसम्बन्धी कुनै जानकारी नभएको र यसबारे कसैले सम्पर्क नगरेको बताएका छन् । विज्ञान, प्रविधि, अनुसन्धान तथा नवप्रवर्तन क्षेत्रमा लगानी बढाउन पुनले लामो समयदेखि आवाज उठाउँदै आएका छन् ।
यसैक्रममा सरकारले चालु आर्थिक वर्षको बजेटमार्फत उक्त क्षेत्रका लागि पूँजीगत खर्चको एक प्रतिशत बजेट विनियोजन गरेको छ । बजेट प्रस्तुत गर्दै डा. स्वर्णिम वाग्लेले यसबारे घोषणा गरेका थिए । पुनले विगतदेखि नै विज्ञान तथा नवप्रवर्तन क्षेत्रका लागि स्पष्ट बजेट व्यवस्था र दीर्घकालीन नीतिको आवश्यकता औंल्याउँदै आएका थिए ।
यसअघि अन्तरिम सरकारमा शिक्षा मन्त्रालयको जिम्मेवारी सम्हालिसकेका पुन गत फागुन २१ गते सम्पन्न निर्वाचनमा म्याग्दीबाट स्वतन्त्र उम्मेदवारका रूपमा विजयी भएका थिए । चुनावमा उनलाई राष्ट्रिय स्वतन्त्र पार्टीको समर्थन रहेको थियो । संसद्मा भने उनी स्वतन्त्र सांसदकै हैसियतमा रहेका छन् ।
विज्ञान र प्रविधिको विकासमार्फत देशको समृद्धिमा योगदान पु¥याउने अभियानमा सक्रिय पुन राष्ट्रिय आविष्कार केन्द्र का संस्थापकका रूपमा परिचित छन् ।
