काठमाडौं, २० जेष्ठ। राष्ट्रिय दलित पत्रकार संघ नेपालको दोस्रो राष्ट्रिय महाधिवेशनमा बोल्दै खगेन्द्र सोनारले देशको प्रशासनिक तथा आर्थिक अवस्थाप्रति कटाक्ष गरेका छन्।
महाधिवेशनलाई सम्बोधन गर्दै उनले बेरुजू र सुशासनको विषय उठाउँदै केवल पढेर-लेखेर, लोकसेवा परीक्षा पास गरेर र ढाका टोपी लगाएर सिंहदरबारमा बसेकै भरमा देश सञ्चालन हुन नसक्ने बताएका हुन्।
उनले जिम्मेवार पदमा पुगेका व्यक्तिहरूले जनताप्रति उत्तरदायी र परिणाममुखी काम गर्नुपर्नेमा जोड दिए।
सांसद सोनारले मुलुकमा बढ्दो बेरुजू, प्रशासनिक कमजोरी तथा जनअपेक्षा अनुरूप काम हुन नसकेको अवस्थाप्रति चिन्ता व्यक्त गर्दै राज्य संयन्त्रलाई थप जवाफदेही बनाउनुपर्ने धारणा राखे।
उनले सुशासन, पारदर्शिता र जनमुखी सेवाप्रवाहलाई प्राथमिकतामा राख्न सरकार तथा कर्मचारी संयन्त्रलाई आग्रह गरे।
राष्ट्रिय दलित पत्रकार संघ नेपालको दोस्रो राष्ट्रिय महाधिवेशनमा विभिन्न राजनीतिक दलका नेता, पत्रकार तथा सरोकारवालाहरूको सहभागिता रहेको थियो।
महाधिवेशनमा दलित पत्रकारिताको अवस्था, चुनौती र अवसरबारे समेत छलफल गरिएको थियो।
