काठमाडौं, १८ जेठ । वैदेशिक रोजगार विभागले पुनः श्रम स्वीकृति (रिइन्ट्री) प्रक्रियालाई पूर्ण रूपमा स्वचालित बनाएको छ। शासकीय सुधारसम्बन्धी १०० बुँदे कार्यसूचीअन्तर्गत वैदेशिक रोजगारीलाई सुरक्षित, मर्यादित र व्यवस्थित बनाउने उद्देश्यले यो व्यवस्था लागू गरिएको विभागले जनाएको छ।
नयाँ व्यवस्थाअनुसार पहिले श्रम स्वीकृति लिएर गएको श्रमिकले सोही देश र कम्पनीमा फर्किन आवेदन गर्दा तोकिएका सबै मापदण्ड पूरा गरेमा स्वचालित रूपमा पुनः श्रम स्वीकृति प्राप्त गर्नेछन्।
यसका लागि वैध राहदानी, भिसा, करार सम्झौता, सामाजिक सुरक्षा तथा कल्याणकारी कोषमा योगदान र जीवन बीमाको प्रमाण आवश्यक हुनेछ।
विभागले फेमिस प्रणालीमा गलत विवरण वा अपूर्ण कागजात पेश गरे त्यसबाट उत्पन्न हुने समस्याको जिम्मेवारी स्वयं सेवाग्राहीले वहन गर्नुपर्ने स्पष्ट गरेको छ।
यो व्यवस्था मन्त्रिपरिषद्बाट स्वीकृत शासकीय सुधार कार्यक्रमअनुसार लागू गरिएको हो।
