काठमाडौं, ३० चैत । वैदेशिक रोजगार विभाग र अध्यागमन विभागबीच समन्वय अभाव हुँदा वैदेशिक रोजगारीमा जाने श्रमिक अन्योलमा परेका छन् ।
वैदेशिक रोजगार विभागले विमानस्थलमा हवाई टिकट, बिल र सेवा शुल्कको रसिद अनिवार्य देखाउनुपर्ने निर्णय गरे पनि अध्यागमन विभागले भने पासपोर्ट र श्रम स्वीकृति बाहेक अन्य कागजात आवश्यक नरहेको स्पष्ट पारेको छ।
यसले दुई निकायबीच विवाद सतहमा ल्याएको छ । यसअघि पनि यस्तै विवादका कारण श्रमिकहरू विमानस्थलबाट फर्किनु परेको थियो। पछिल्लो निर्णयप्रति नेपाल वैदेशिक रोजगार व्यवसायी संघले आपत्ति जनाउँदै अतिरिक्त कागजात अनिवार्य गर्नु झन्झटपूर्ण हुने बताएको छ ।
विज्ञहरूले नीतिगत स्पष्टता र निकायबीच समन्वयको अभावका कारण यस्तो समस्या दोहोरिएको भन्दै श्रमिकमै यसको प्रत्यक्ष असर परेको बताएका छन् ।
