जनकपुर, २५ फागुन । धनुषा निर्वाचन क्षेत्र नम्बर १ मा निर्वाचन अधिकृतको कार्यालयले नेपाली कम्युनिस्ट पार्टीका उम्मेदवार मातृकाप्रसाद यादवलाई निर्वाचित भएको प्रमाणपत्र प्रदान गरेको छ ।
राष्ट्रिय स्वतन्त्र पार्टीका उम्मेदवार किशोरी शाह कमलको उम्मेदवारी खारेजीपछि मतगणनाको अन्तिम परिणाम विवादमा रहेको अवस्थामा यादवलाई प्रमाणपत्र दिइएको हो ।
अन्तिम मतपरिणामअनुसार यादवले १० हजार ४०३ मत प्राप्त गरेका थिए । नेपाली कांग्रेसका रामपल्टन साहले ९ हजार ५०२ तथा एमालेका रामचन्द्र मण्डलले ९ हजार ३१५ मत प्राप्त गरेका थिए ।
यद्यपि घन्टी चुनाव चिह्नमा १३ हजारभन्दा बढी मत खसेको भए पनि उम्मेदवारी खारेजीका कारण रास्वपाका उम्मेदवारको परिणाम सार्वजनिक गरिएको छैन ।
उम्मेदवारी खारेजीविरुद्ध रास्वपा उम्मेदवारले सर्वोच्च अदालतमा रिट दिएका थिए र अदालतले अन्तिम परिणाम सार्वजनिक नगर्न आदेश दिएको थियो ।
यसबीच आफू सबैभन्दा बढी मत ल्याएको उम्मेदवार भएको दाबी गर्दै यादवले परिणाम घोषणा गर्न दबाब दिएका थिए । उनका समर्थकहरूले निर्वाचन अधिकृतको कार्यालय अगाडि धर्ना समेत दिएका थिए ।
