काठमाडौं, २१ फागुन । प्रधानमन्त्री सुशीला कार्कीले कतारका प्रधानमन्त्री शेख मोहम्मद बिन अब्दुलरहमान अल-थानीसँग टेलिफोन वार्ता गर्दै पश्चिम एसियाको पछिल्लो परिस्थितिबारे चासो व्यक्त गरेकी छन् ।
बिहीबार भएको संवादमा प्रधानमन्त्री कार्कीले कतारमा रहेका करिब ३ लाख ६० हजार नेपाली नागरिकलाई सुरक्षा र संरक्षण उपलब्ध गराएकोमा कतार सरकारलाई धन्यवाद दिइन् ।
उनले नेपालले क्षेत्रीय घटनाक्रमलाई नजिकबाट नियालिरहेको बताउँदै सबै पक्षलाई संयमित रहन र नागरिक सुरक्षालाई प्राथमिकता दिन आग्रह गरिन् ।
कार्कीले अन्तर्राष्ट्रिय कानुन, संयुक्त राष्ट्रसंघको बडापत्र तथा मानवीय कानुनको सम्मान हुनुपर्नेमा जोड दिँदै वार्ता र कूटनीतिको माध्यमबाट मात्र दीर्घकालीन शान्ति सम्भव हुने बताइन् ।
कतारी प्रधानमन्त्री अल–थानीले नेपाल–कतारबीचको मैत्रीपूर्ण सम्बन्धको प्रशंसा गर्दै कतारमा रहेका नेपालीहरूले देशको विकासमा महत्वपूर्ण योगदान दिएको उल्लेख गरे ।
उनले वर्तमान परिस्थितिमा नेपाली नागरिकलाई कतारी नागरिकसरह सुरक्षा र संरक्षण उपलब्ध गराइने आश्वासन पनि दिए ।
