जनकपुर, १५ फागुन । धनुषा निर्वाचन क्षेत्र नम्बर २ का जनता समाजवादी पार्टी नेपालका प्रतिनिधिसभा सदस्य उम्मेदवार पशुपति यादवले वर्तमान राजनीतिक परिस्थितिमा परम्परागत दलहरूको प्रभाव घट्दै गएको दाबी गरेका छन् ।
एक अन्तर्वार्ताका क्रममा उनले जेन–जी आन्दोलनका कारण नेपाली कांग्रेस र नेकपा एमाले सडकमा पछाडि परिसकेको टिप्पणी गरे । यादवले आफ्नो निर्वाचन क्षेत्रमा एमालेका उम्मेदवार उमाशंकर अरगरिया पहिलेदेखि नै अवसर खोज्दै हिँड्ने नेता भएको आरोप लगाए ।
“उमाशंकर अरगरियालाई नेता बनाउने काम त हाम्रो पार्टीले नै गरेको हो,” भन्दै उनले राजनीतिक अवसरवादको आलोचना गरे । उनले घण्टी चुनाव चिह्नको आफ्नो क्षेत्रमा कुनै प्रभाव नरहेको दाबी गर्दै भने, “घण्टी बजाउने वा नबजाउने व्यक्तिको व्यक्तिगत रुचिमा भर पर्छ, जनताले मन नपराए घण्टी फालिदिन्छन् ।
यसको विपरीत छाता चुनाव चिह्न (जसपा नेपाल) क्षेत्रभरि मजबुत बन्दै गएको उनको भनाइ छ । मधेस समुदायको अधिकार, पहिचान र हित संरक्षणका लागि जसपा नेपाल नै उपयुक्त विकल्प भएको उल्लेख गर्दै यादवले मतदातालाई छाता छापमा मतदान गर्न आग्रह गरेका छन् । मधेसका मुद्दा बुझ्ने र समाधान गर्न सक्ने पार्टी जसपा नेपाल मात्र भएको उनको दाबी छ ।
