जनकपुरधाम, २६ पुस । धनुषामा जग्गा अतिक्रमणको विषयलाई लिएर स्थानीय र प्रहरीबीच झडप हुँदा कम्तीमा ८ जना घाइते भएका छन् ।
मिथिला नगरपालिका–२ अन्तर्गत सुकजोरस्थित सन्त रामपाल आश्रम अगाडि शनिबार झडप भएको हो । प्रहरीका अनुसार आश्रम आसपासको जग्गा अतिक्रमण गरिएको भन्दै स्थानीयले विरोध जनाएपछि स्थिति तनावग्रस्त बनेको थियो ।
विरोध प्रदर्शन चर्किँदै जाँदा ढुंगामुढा र होहल्ला भएपछि स्थिति नियन्त्रण बाहिर जाने संकेत देखिएपछि प्रहरीले अश्रुग्यास प्रहार गरेको हो ।
धनुषाका प्रहरी प्रवक्ता तथा डीएसपी गणेश बमका अनुसार स्थिति नियन्त्रणमा लिन नेपाल प्रहरीले ७ सेल र सशस्त्र प्रहरीले ९ सेल गरी कुल १६ सेल अश्रुग्यास प्रहार गरेको छ ।
झडपमा घाइते भएका सबै स्थानीय रहेको र उनीहरूको उपचार भइरहेको प्रहरीले जनाएको छ । झडपपछि आक्रोशित स्थानीयहरूले जनकपुर–ढल्के सडक खण्ड अवरुद्ध गरेका थिए, जसका कारण यातायात प्रभावित बनेको थियो ।
