काठमाडौं, ३० कात्तिक । सरकारले विदेशमा रहेका नेपाली नागरिकलाई समानुपातिक प्रणालीतर्फ मतदान गर्न अनुमति दिने व्यवस्था गर्न अध्यादेशमार्फत कानुन संशोधनको तयारी गरेको छ ।
गृह मन्त्रालयले तयार पारेको मस्यौदा कानुन, न्याय तथा संसदीय मामिला मन्त्रालयमा पठाइएको छ, जसमा मतदाता नामावली, प्रतिनिधि सभा निर्वाचन, निर्वाचन कसुर तथा सजाय, र निर्वाचन आयोग सम्बन्धी चार ऐन संशोधन प्रस्ताव छन्।
अध्यादेशले विदेशस्थित दूतावास वा नियोगमार्फत मतदान केन्द्र तोक्ने र त्यहाँका कर्मचारीलाई मतदान अधिकृतको भूमिका दिने व्यवस्था प्रस्ताव गरेको छ।
हाल नेपालभित्रै आफ्नै क्षेत्रबाहिर रहेका मतदातालाई समानुपातिकतर्फ मतदान गराउने विषय मस्यौदामा समावेश नभए पनि त्यसबारे छलफल भइरहेको बताइएको छ। सम्बन्धित मन्त्रालयबाट परिमार्जनपछि मस्यौदा मन्त्रिपरिषदमा पुग्ने र स्वीकृत भएपछि राष्ट्रपतिबाट जारी भई राजपत्र प्रकाशित भएपछि कार्यान्वयनमा आउनेछ। यी सबै प्रक्रिया एक साताभित्र सक्ने तयारी भइरहेको छ।
सर्वोच्च अदालतले दशकअघि नै विदेशस्थित नेपालीलाई मतदानको अवसर दिन कानुन बनाउन आदेश दिएको थियो। जेनजी आन्दोलनपछि बनेको अहिलेको सरकारले उक्त आदेश कार्यान्वयनतर्फ कदम चालिरहेको छ।
प्रतिनिधि सभा निर्वाचन फागुन २१ गते तोकिएको छ र दल दर्ताको काम अन्तिम चरणमा पुगेको छ।
