काठमाडौं, २४ कात्तिक । बाराको जितपुरसिमरा उपमहानगरपालिका–१६ अन्तर्गत पूर्व–पश्चिम राजमार्गको पथलैया–निजगढ खण्डमा जंगली हात्तीले आइतबार रातिदेखि निरन्तर आतंक मच्चाएको छ ।
स्थानीयवासी र सवारी चालकहरू आइतबार बेलुकीदेखि नै हात्तीको उपस्थितिले त्रसित बनेका थिए । सोमबार बिहान करिब ८ बजे ना४ख १८३० नम्बरको ट्रक चालकलाई हात्तीले आक्रमण गरेको प्रहरीले बताए ।
ट्रक रोकिएपछि चालकले ज्यान जोगाउन भाग्ने प्रयास गरे पनि हात्तीको आक्रमणमा परेर जितपुरसिमरा–१ निवासी करिब ४० वर्षीय राजकुमार चौधरीको घटनास्थलमै मृत्यु भएको हो ।
बारा प्रशासनले आइतबार रातिदेखि नै राजमार्ग हुँदै सवारी साधन नचलाउन र वैकल्पिक मार्ग प्रयोग गर्न चालकहरूलाई अनुरोध गरेको थियो । तर केहीले सो सल्लाह बेवास्ता गरेपछि सोमबार बिहान दुर्घटना घटेको प्रहरीले जनाए ।
पिलुवा र निजगढबीचको क्षेत्रमा हात्ती विशेष सक्रिय रहेको बताइएको छ । हात्तीलाई नियन्त्रणमा लिन र सडक क्षेत्र सुरक्षित बनाउन बारा र चितवनबाट हात्ती तथा वन कर्मचारीसहितको विशेष टोली खटाइएको छ ।
प्रहरीका अनुसार उक्त टोली परिचालन भएपछि सोमबार दिउँसो करिब १२ः३० बजेबाट राजमार्गमा सवारी सञ्चालन सुचारु गरिएको छ ।
