जनकपुर, २ कार्तिक । धनुषा जिल्लाको क्षिरेश्वरनाथ नगरपालिका क्षेत्रमा ज्यान मार्ने उद्योगसम्बन्धी मुद्दामा सात जनाविरुद्ध जिल्ला अदालत, धनुषाबाट पक्राउ पुर्जी जारी गरिएको छ ।
मुद्दाको सुरुवात क्षिरेश्वरनाथ नगरपालिका–५ का सुशिल कुमार चौधरीले जिल्ला प्रहरी कार्यालयमा दिएको जाहेरीबाट भएको हो । जाहेरीमा आफ्नो ज्यानमाथि नियोजित हमला प्रयास गरिएको दाबी गर्दै दोषीहरूलाई कारबाहीको माग गरिएको थियो ।
जाहेरीका आधारमा नेपाल सरकार वादी बनी क्षिरेश्वरनाथ–१ रमदैया गाउँ निवासी ३८ वर्षीय उमेश यादव, क्षिरेश्वरनाथ–५ निवासी ६२ वर्षीय पूर्व मेयर योगेन्द्र पंजियार र उनका छोरा ३५ वर्षीय अमर पंजियार, ६० वर्षीय जिवछ मण्डल, उनका छोरा ४० वर्षीय नवल मण्डल, नवलका छोरा २२ वर्षीय निरज मण्डल, तथा जिवछका अर्का छोरा ३८ वर्षीय कमल मण्डल (धानुक) विरुद्ध मुद्दा दर्ता गरिएको हो ।
अदालतको आदेश र पुर्जी विवरणः
जिल्ला अदालत, धनुषाबाट जारी आदेशअनुसार पक्राउ पुर्जी अनुसूची नम्बर २२, २३ र २५ गरी जम्मा ६३ पृष्ठको रहेको छ । यसमा आरोपित सबैका नाम, ठेगाना, उमेर र आरोपहरू उल्लेख गरिएको छ ।
पक्राउ पुर्जी तामेल गरेर तामेली प्रतिवेदन अदालतमा बुझाउने जिम्मेवारी सम्बन्धित सुरक्षानिकायलाई दिइएको छ ।
प्रहरी अनुसन्धानः
स्रोतका अनुसार, यो मुद्दा ज्यान मार्ने उद्योगअन्तर्गत दर्ता भएकोले अनुसन्धानको दायरा गम्भीर ढंगले अगाडि बढाइएको छ ।
घटनाको गम्भीरता र संलग्न व्यक्तिहरूको सामाजिक÷राजनीतिक हैसियतलाई दृष्टिगत गर्दै अनुसन्धान उच्च प्राथमिकतामा राखिएको बताइएको छ ।
