जनकपुर, २९ असोज । मधेश प्रदेशको नयाँ मुख्यमन्त्रीका रूपमा लोकतान्त्रिक समाजवादी पार्टी (लोसपा)का नेता जितेन्द्र सोनल नियुक्त भएका छन्।
प्रदेश प्रमुख सुमित्रा सुवेदी भण्डारीले संविधानको धारा १६८(२) अनुसार उनलाई मुख्यमन्त्री नियुक्त गरेकी हुन्।
सोनलले ६ दलको समर्थनसहित ५७ प्रदेश सांसदको हस्ताक्षर लिएर दाबी पेश गरेका थिए। कांग्रेसका नेता कृष्णप्रसाद यादवले पनि १३ जनमत सांसदको समर्थन दाबी गर्दै मुख्यमन्त्री बन्न खोजे पनि जनमत पार्टीले त्यसलाई खण्डन गरेपछि सोनलको पक्षमा बहुमत पुगेको हो।
मुख्यमन्त्री नियुक्ति प्रक्रियामा जनमत पार्टीभित्र विभाजन देखिएको छ।
निवर्तमान मुख्यमन्त्री सतिश कुमार सिंह र पूर्वमन्त्री त्रिभुवन साह जनस्वराज पार्टीतर्फ गएकाले पार्टीमा असन्तोष र सामान्य झडप समेत भएको बताइएको छ।
