जनकपुर, १७ असोज । जनकपुरको ऐतिहासिक राजदेवी मन्दिरको अगाडी च्यतिएको हनुमान ध्वजले जनमानसमा गम्भीर असन्तोष पैदा गरेको थियो ।
धार्मिक आस्था र सांस्कृतिक गौरवको प्रतीक मानिने उक्त ध्वज महिनौदेखि जिर्ण अवस्थामा रहेको देखिएपछि स्थानीयवासी र श्रद्धालुहरू बीच तीव्र प्रतिक्रिया आएको थियो ।
केपी खबरद्वारा सार्वजनिक गरिएको समाचार र भिडियो रिपोर्टले यो विषयको चासो बढाएपछि सम्बन्धित निकायहरूले तुरुन्तै उक्त च्यातिएको झण्डा हटाएर नयाँ झण्डा प्रतिस्थापन गरेका छन् ।
उक्त ध्वज भगवान हनुमानको प्रतीक हो, जुन महिनौपछि पनि मर्मत नगरिएको अवस्थामा रहँदा धार्मिक श्रद्धा र नगरको गरिमामा आँच पुगेको जनाइएको थियो ।
अझ विशेष गरी दसैँ जस्तो ठूला पर्वका अवसरमा मन्दिर रंगीचंगी बत्ती, तोरण, र फूलमालाले सजिएको अवस्थामा च्यातिएको ध्वजको उपस्थिति श्रद्धालुहरूका लागि पीडादायक बन्यो ।
स्थानीय युवा क्लबहरू र नगर निकायहरू लाखौँ रुपैयाँ खर्च गरेर मन्दिर क्षेत्र सजाउने काममा लागे पनि यति संवेदनशील पक्षमा ध्यान नजानु लापरवाहीको संज्ञा दिइएको थियो ।
ध्वज प्रतिस्थापनपछि स्थानीय बासिन्दा तथा श्रद्धालुहरूमा केही हदसम्म सन्तोष व्यक्त भएको छ । यद्यपि उनीहरूले यस्ता धार्मिक र सांस्कृतिक प्रतीकहरूको संरक्षण र संवद्र्धनमा निरन्तर ध्यान दिन सम्बन्धित पक्षलाई आग्रह गरेका छन् ।
