काठमाडौं, १० साउन । नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ ले नेपालमा अहिलेको मुख्य दुस्मन राजतन्त्र नभएको स्पष्ट पारेका छन् ।
शनिबार काठमाडौंमा आयोजित एक सार्वजनिक कार्यक्रमलाई सम्बोधन गर्दै उनले देशको विकास र समृद्धिको यात्रामा मुख्य अवरोध अब राजतन्त्र होइन, दलाल पुँजीवाद, भ्रष्टाचार, र नोकरशाही पूँजीवाद रहेको दाबी गरे ।
उनका अनुसार, यदाकदा राजतन्त्र र सामन्ती निरङ्कुश तन्त्र पुनःसक्रिय हुन खोजे पनि ती अब नेपालको मूल चुनौती बन्न नसक्ने अवस्थामा छन् । “राजतन्त्र उठ्न खोजे पनि उठ्नेवाला छैन,” भन्दै उनले ध्यानाकर्षण गराए कि अबको मुख्य खतरा अर्थतन्त्र र राज्यसत्ता केही सीमित शक्तिकेन्द्र र बिचौलियाको नियन्त्रणमा जानु हो ।
अध्यक्ष दाहालले भने, “नेपालमा अहिले दलाल पुँजीपतिको समूह, बिचौलिया र केही मुठीभर व्यक्तिहरूले नेपाल राज्यलाई विध्वंसतर्फ डो¥याइरहेका छन्। नेपालको अर्थतन्त्र र विकास प्रक्रिया केही थोरै शक्तिकेन्द्रमा सीमित भएको छ ।
उनका अनुसार, “नोकरशाही पूँजीवाद” अहिलेको सबैभन्दा ठूलो अवरोधको रूपमा देखिएको छ, जसले योजनाहरूको कार्यान्वयनमा ढिलाइ, अपारदर्शिता र जनतालाई टाढा राख्ने काम गरिरहेको छ ।
संघीय निजामती सेवा विधेयकमाथि हाल देखिएको चलखेल र राजनीतिक हस्तक्षेपप्रति असन्तुष्टि जनाउँदै दाहालले भने, “विधेयकमाथिको छेडछाडले सम्पूर्ण सांसदहरू अपमानित हुने अवस्था सिर्जना गरेको छ।
अदालत, ब्यूरोक्रेसी र राज्य संयन्त्रमा व्यापक विकृति देखिएको छ । उनले अहिलेको प्रमुख आवश्यकता भ्रष्टाचार, दलाल पुँजीवाद, र नोकरशाहीविरुद्ध सबै दल र जनशक्तिहरूको साझा संकल्प र ऐक्यबद्धता भएको बताए ।
“यो समय राजनीतिक ध्रुवीकरणको होइन, जनताको हितमा समवेत आवाज उठाउने हो,” अध्यक्ष दाहालले भने ।
