काठमाडौं, २० मंसिर । उपत्यका अपराध अनुसन्धान कार्यालय, बानेश्वरको टोलीले मंगलबार राति ७ किलो ८ सय ग्राम सुनसहित ‘ओमपाल गोल्ड शप’ का सञ्चालक पदमप्रसाद पाण्डेलाई पक्राउ गरेको एसएसपी सोमेन्द्रसिंह राठौरले बताए ।
पाण्डेले तस्करीको सुन गालेर गहना बनाएर बेच्ने गरेको सूचना प्रहरीले पाएको थियो ।
त्यसको आधारमा पुगेको प्रहरी टोलीले छापा मारेर सुन बरामद गरेको छ ।
केही सुन ढिक्कामा छन् भने केही गहना समेत प्रहरीले बरामद गरेको जनाएको छ ।
सुन कहाँबाट ल्याइएको हो भन्ने विषयमा अनुसन्धान भइरहेको एसपी रवीन्द्र रेग्मीले बताए ।
