मधेश प्रदेशमा गठबन्धन दलका मन्त्रीहरु हटाउने तयारी हुदै

जनकपुरधाम, २७ असोज । मधेश प्रदेशका मुख्यमन्त्री लालबाबु राउतले गठबन्धन दलबाट मन्त्रिपरिषदका नेताहरुलाई हटाउने तयारी गरेका छ ।
प्रधानमन्त्री शेरबहादुर देउवाले संघीय मन्त्रिपरिषदबाट जनता समाजवादी पार्टीका मन्त्रीहरुलाई बर्खास्त गरेसँगै यता राउतले पनि मधेश सरकारको मन्त्रिपरिषदबाट नेकपा माओवादी केन्द्र, नेपाली कांग्रेस र एकीकृत समाजवादीका नेताहरुलाई हटाउने तयारी गरेका छन् ।
मधेश सरकारका अर्थमन्त्री शैलेन्द्र साहले मन्त्री हटाउने विषयमा छलफल भइरहेको बताएका छन । प्रदेश सरकारमा कांग्रेसका ३, एकीकृत समाजवदीका २ मन्त्री र एक राज्यमन्त्री, माओवादीका एक मन्त्री र एक राज्यमन्त्री छन् ।
सत्ता गठबन्धन छाडेर जसपाले नेकपा एमालेसंग गठबन्धन गरेको छ । त्यसै कारण प्रधानमन्त्री देउवाले संघीय सरकारका संघीय मामिला तथा सामान्य प्रशासन मन्त्री राजेन्द्र श्रेष्ठ, कृषि तथा पशुपंक्षी विकासमन्त्री मृगेन्द्रकुमार सिंह यादव, भौतिक पूर्वाधार तथा यातायातमन्त्री मोहम्मद इश्तियाक राई र वन तथा वातावरण मन्त्री प्रदीप यादवलाई बिहीबार बर्खास्त गरेका छन् ।