जनकपुरधाम, ८ माघ । भारतको अयोध्यामा नवनिर्मित राम मन्दिरको प्राण प्रतिष्ठा भएको छ । राम मन्दिरको गर्भगृहमा पूजा गर्दै विधिवत् रूपमा प्राण प्रतिष्ठा भारतीय प्रधानमन्त्री नरेन्द्र मोदीले गरेका हुन् ।
गर्भगृहमा मोदीसँगै आरएसएस प्रमुख मोहन भागवत, मुख्यमन्त्री योगी आदित्यनाथ, आनन्दीबेन पटेललगायतले साथ दिएका थिए । स्थानीय समयअनुसार १२:२९:०८ बजे शुभ मुहूर्त भएको हो । ८४ सेकेन्डको उक्त मुहूर्त १२:३०:३२ बजेसम्म चलेको थियो ।
पूजाको नियमअनुसार मोदीले यम नियमको पालना गरी प्राण प्रतिष्ठा पूजा गरेका हुन् । उनले ११ दिनदेखि नरिवलको पानी मात्र पिएर भुईँमा सुतेर अनुष्ठान गरेका थिए ।
प्राण प्रतिष्ठाका क्रममा मोदीले भगवान रामका कारण सोमबारको दिन एक अद्भुत आभा लिएर आएको बताए । मोदीले आजको दिन पात्रोमा छापिएको एक मिति मात्र नभएर नयाँ कालचक्रको उद्गम भएको बताए ।
मोदीले भने, ‘आजको दिन क्यालेण्डरमा राखिएको मिति मात्र होइन । यो एक नयाँ कालचक्रको उद्गम हो । राम मन्दिरको भूमि पूजा गरेदेखि देशमा उत्साह र उमङ्ग बढ्दै गएको छ ।
आम नागरिकले सदियौँदेखि पर्खिरहेको धरोहर प्राप्त भएको भन्दै प्रधानमन्त्री मोदीले मुलुकमा नव इतिहासको सुरुवात गरेको बताए ।
