काठमाडौं, ९ असोज । स्वास्थ्यकर्मीमाथि आक्रमणमा संलग्नमाथि कारबाहीको माग गर्दै आन्दोलनरत चिकित्सकहरूसँग सरकारले छलफल गरेको छ ।
सरकारले स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन २०६६ अनुसार दोषीलाई कारबाही गर्ने प्रतिबद्धता जनाएको छ । मंगलबार गृह मन्त्रालयमा भएको छलफलमा हरेक स्वास्थ्य संस्थामा उपचारबारे कुनै गुनासो भए उजुरी गर्ने पेटिका राख्ने र कानुन हातमा लिने प्रयास गरे हुने कारबाहीबारे सूचना राख्न सरकारले प्रतिबद्धता जनाएको छ ।
छलफलमा उपप्रधानमन्त्री तथा गृहमन्त्री नारायणकाजी श्रेष्ठ, स्वास्थ्यमन्त्री मोहन बस्नेत, नेपाल मेडिकल काउन्सिल, चिकित्सक संघ, नर्सिङ संघलगायतका प्रतिनिधिको उपस्थिति थियो ।
उपप्रधानमन्त्री तथा गृहमन्त्री नारायणकाजी श्रेष्ठले सबै घटनामा संलग्नहरुलाई ऐनअनुसार नै कारबाही गर्ने प्रतिबद्धता जनाएको चिकित्सक संघका अध्यक्ष डा. अनिलविक्रम कार्कीले जानकारी दिनुभएको छ ।
डाक्टरहरूले आक्रमण गर्नेलाई पुर्पक्षका लागि थुनामा पठाएर घटनाको अनुसन्धान गर्नुपर्ने माग राखेका थिए ।
