जनकपुरधाम, २२ साउन । धनुषाको मुखियापट्टी मुसहरनियामा विद्यालयमा भवन निर्माणको विषयलाई लिएर दुई समूहबीच झडप हुदा दुईजना गम्भीर घाइते भएका छन् ।
मुखियापट्टी मुसहरनिया गाउँपालिका ४ कोल्हुवा स्थित वैद्यनाथ देवनारायण जनता नमूना माध्यमिक विद्यालयमा आइतबार झडप भएको छ ।
भवन निर्माण गुणस्तरहीन भइरहेको र खर्च पारदर्शी नभएको भन्दै आइतवार भएको दुई पक्षीय झडपमा स्थानीय ज्ञानेन्द्र यादव र शंकर यादव गम्भीर घाइते भएका छन् ।
धनुषा प्रहरीका अनुसार घाइते मध्ये ज्ञानेन्द्रलाई थप उपचारका लागि काठमाडौ रेफर गरिएको छ । शंकरको जनकपुरकै एक हस्पीटलमा उपचार भइरहेको छ ।
धनुषाका एसपी विश्वराज खड्काका अनुसार स्थानीय केही युवाहरुले विद्यालय भवन निर्माण कमसल र गुणस्तरहीन भइरहेको भन्दै खर्च हिसाब पारदर्शीको माग गर्दा बिबाद भएको थियो ।
बिबाद झडपमा परिणत भएपछि स्थिति नियन्त्रणमा लिन प्रहरीले तीन राउण्ड हवाई फायर गरेको छ ।
