जनकपुरधाम,११ जेठ । लोसपा नेपालबाट मधेश सरकारमा पर्साको निर्वाचन क्षेत्र नम्बर–२ (ख)बाट निर्वाचित लोसपाका प्रदेशसभा सदस्य रमेशप्रसाद कुर्मीले पद तथा गोपनीयताको शपथ लिएका हुन् ।
कुर्मीलाई बिहीबार साँझ प्रदेश प्रमुख हरिशैकर मिश्रले शपथ ग्रहण गराएका हुन् । कुर्मीलाई मुख्यमन्त्री यादवले आफैँसँग राखेको वन तथा वातावरण मन्त्रालयको जिम्मेवारी दिएका छन् ।
वन तथा वातावरण मन्त्रालयको राज्यमन्त्रीको नाम भने पछि टुंगो लाग्ने जनाएको छ । योसँगै मधेस प्रदेशमा पाँचौँपटक मन्त्रिपरिषद विस्तार भएको छ । 
यसअघि मंगलबार मुख्यमन्त्री यादवले नेपाली कांग्रेस र नेकपा एकीकृत समाजवादी पार्टीलाई सरकारमा सहभागी गराई चौथोपटक मन्त्रिपरिषद विस्तार गरेका थिए ।
मुख्यमन्त्री यादवले गृह सञ्चार तथा कानुन मन्त्रालय र श्रम तथा यातायात मन्त्रालय भने अहिले पनि आफूसँगै राखेका छन् । त्यस्तै, जसपाबाट गत २० माघमा सामाजिक विकास मन्त्रीको जिम्मेवारी पाएकी सुरिता साह मन्त्रालयविहीन बनेकी छन् । 
उनको जिम्मेवारी पछि तोकिनेजनाएको छ । मधेस प्रदेश सरकारको दोस्रो कार्यकालका लागि २९ पुस ०७९ मा शपथ लिएसँगै कार्यभार सम्हालेका मुख्यमन्त्री यादवलाई ४ माघमा बसेको प्रदेशसभा बैठकमा १०२ जना प्रदेशसभा सदस्यले विश्वासको मत दिएका थिए ।
