काठमाडौं,१० चैत्र । मन्त्रिपरिषदको बैठक सिंहदरबारमा आज बस्दैछ । अपरान्ह ४ बजे बस्ने मन्त्रिपरिषद् बैठकले प्रहरी महानिरीक्षक (आइजिपी) नियुक्तिबारे निर्णय गर्ने जनाएको छ ।
आज मध्यरातिदेखि प्रहरी महानिरीक्षक धिरजप्रताप सिंह अवकासमा जान लागेकाले सरकारले नयाँ आइजिपी नियुक्तिको तयारी गरेको हो ।
नयाँ आइजिपीका लागि वसन्त कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्य गरी पाँच महानिरीक्षक प्रतिस्पर्धामा छन् ।
काम गर्नसक्ने सक्षम, सङ्गठनलाई कमाण्ड गर्नसक्ने, नेतृत्व दिनसक्नेलगायतलाई आधार मानेर नेपाल सरकारले आइजिपी बनाउनसक्ने विद्यमान अवस्था रहेको पूर्वप्रहरी अधिकारी बताए ।
मापदण्ड हेर्दा व्याख्याअनुसार जसलाई बनाए पनि हुने जस्तो देखिन्छ’, पूर्वप्रहरी अतिरिक्त महानिरीक्षक पुष्कर कार्कीले भने, ‘सरकारले राम्रै र सक्षम व्यक्तिलाई ल्याउँछ, यो नियमित प्रक्रिया हो जस्तो लाग्छ मलाई ।’
पछिल्लो समयमा गृह मन्त्रालयले सरुवा बढुवामा मापदण्ड नै बनाएर लागू गरेको छ । सरकारले उपयुक्त व्यक्ति हो भन्ने व्याख्याका आधारमा गरेर पाँचमध्ये एकलाई आइजिपी बनाउनसक्ने देखिएको प्रहरी अधिकृतहरू बताउनुभएको छ ।
