जनकपुरधाम,१६ फागुन । जनमत पार्टीका भातृसंगठन विद्यार्थी जनमत संघले स्वतन्त्र विद्यार्थी युनियन (स्ववियु) चुनाव एक्लै लड्ने निर्णय गरेको हो ।
मंगलबार काठमाडौंमा बसेको केन्द्रीय समिति बैठकले स्ववियु चुनाव एक्लै लड्ने निर्णय गरेको छ ।
विद्यार्थी जनमत संघ पहिलो पटक स्ववियु निर्वाचनमा सहभागी भइरहेकोले देशभरका कलेजहरुमा एक्लै चुनाव लड्ने निर्णय गरेको निर्वाचन परिचालन समितिका सभापति बीपी साहले जानकारी दिनुभएको छ ।
संघको बैठकमा पार्टीका केन्द्रिय अध्यक्ष डा. सीके राउतले भने उच्च मनोबलका साथ चुनावमा सहभागी हुन विद्यार्थी नेताहरुलाई निर्देशन दिएका छन ।
उनले भने, ‘देशका परिवर्तनहरुमा विद्यार्थीहरुको भूमिका महत्वपूर्ण छ । अब देशको शिक्षाको सुधारमा विद्यार्थीहरुले पनि महत्वपूर्ण भूमिका खेल्नुपर्छ ।
अध्यक्ष राउतले लामो समयदेखि रोकिएको स्ववियुको निर्वाचनले अब नयाँ नेतृत्वको उदय गराउने विश्वास व्यक्त गरे ।
यसैगरी केन्द्रीय समिति बैठकले निर्वाचन परिचालन समितिको केन्द्रीय सभापतिमा बीपी साहलाई चयन गरेको छ भने समन्वयको जिम्मेवारी मधेस प्रदेश सरकारका कृषि राज्यमन्त्री सञ्जयकुमार यादवलाई दिइएको छ ।
