जनकपुर, २४ कार्तिक । धनुषाको क्षिरेश्वरनाथ नगरपालिका–५ बनिनियामा दुई युवामाथि चक्कु प्रहार भएको छ। चक्कु प्रहारबाट २४ वर्षीय सोनु यादव र २१ वर्षीय रोहित यादव घाइते भएका छन्।
प्राप्त जानकारीअनुसार, सोमबार अन्सु यादवले एक बालकलाई ठक्कर दिएपछि उनलाई सम्झाउन गएका सोनु यादवले एक–दुई झापड हानेका थिए। सोही घटनालाई लिएर भएको विवादपछि मंगलबार बिहान करिब ११ बजे अन्सु यादवले सोनु र रोहितमाथि चक्कु प्रहार गरेको आरोप छ।
घटनाबारे सोनुका भाइ कुश यादवले जानकारी दिएका हुन्। घाइते दुवै जनाको प्रादेशिक अस्पताल जनकपुरधाममा उपचार भइरहेको छ।
घटनाबारे थप जानकारी लिन इलाका प्रहरी कार्यालय महेन्द्रनगरका प्रहरी निरीक्षकसँग सम्पर्क गर्ने प्रयास गरिए पनि सम्पर्क हुन सकेन। प्रहरीले घटनाबारे आधिकारिक विवरण सार्वजनिक गरिसकेको छैन।
