काठमाडौं, १९ कात्तिक । प्रहरी महानिरीक्षक -आईजीपी) पदबाट हटाइएपछि दानबहादुर कार्कीले पुनर्बहालीको माग गर्दै सर्वोच्च अदालतमा रिट निवेदन दिएका छन् ।
सरकारले बुधबार कार्कीलाई प्रहरी महानिरीक्षकको जिम्मेवारीबाट हटाएर डा. मनोजकुमार केसीलाई नयाँ आईजीपी नियुक्त गर्ने निर्णय गरेको थियो । उक्त निर्णयविरुद्ध कार्की न्यायिक उपचारको माग गर्दै सर्वोच्च अदालत पुगेका हुन् ।
कार्कीका निकट अधिवक्ता टिकाबहादुर कुँवरका अनुसार आईजीपी नियुक्तिसम्बन्धी सरकारी निर्णयलाई चुनौती दिँदै रिट निवेदन सर्वोच्चमा पेस गरिएको हो । उक्त रिट दर्ता प्रक्रियामा रहेको उनले जानकारी दिएका छन् ।
सरकारको निर्णयपछि प्रधानमन्त्रीको सुरक्षा सल्लाहकारमा सरुवा भएका कार्कीले आफूलाई पदबाट हटाउने निर्णय कानुनी रूपमा चुनौती दिएका हुन् ।
यसैबीच, सरकारले नियुक्त गरेका डा. मनोजकुमार केसीले बुधबारदेखि नै प्रहरी महानिरीक्षकको जिम्मेवारी सम्हालिसकेका छन् ।
