सप्तरी, १३ कात्तिक । सप्तरी र सुनसरी जिल्लालाई जोड्ने कोसी ब्यारेजको विकल्पका रूपमा कञ्चनपुरदेखि सुनसरीको राजाबाससम्म तीन किलोमिटर लामो नयाँ पुल निर्माण गर्ने तयारी अघि बढाइएको छ।
सडक विभाग आयोजना निर्देशनालयका अनुसार एसियाली विकास बैंक (एडीबी) को सहयोगमा निर्माण हुने यस परियोजनाको अनुमानित लागत ४३ अर्ब रुपैयाँ रहेको छ।
परियोजना अन्तर्गत तीन किलोमिटर लामो पुलसँगै ४३ किलोमिटर नयाँ सडकसमेत निर्माण गरिनेछ। पुल सञ्चालनमा आएपछि पूर्व–पश्चिम राजमार्गको दूरी करिब १४ किलोमिटर घट्ने अपेक्षा गरिएको छ।
आयोजना निर्देशक चुडाराज ढकालका अनुसार पुल तथा सडक निर्माणका लागि प्राविधिक र प्रक्रियागत तयारी भइरहेको छ। परियोजना क्षेत्र कोसीटप्पु वन्यजन्तु आरक्षसँग जोडिएकाले वातावरणीय तथा कानुनी स्वीकृतिका विषयमा आवश्यक प्रक्रिया अघि बढाउनुपर्ने अवस्था छ।
पुरानो हुँदै गएको कोसी ब्यारेजमा बढ्दो सवारी चापलाई ध्यानमा राख्दै निर्माण गर्न लागिएको वैकल्पिक पुलले पूर्वी नेपालको यातायात व्यवस्थापनलाई सहज बनाउने विश्वास गरिएको छ।
