काठमाडौं, १३ कात्तिक । भोटेकोशी करिडोरमा आएको बाढीपहिरोबाट प्रभावित आयोजनाको सुरुङभित्र खोज तथा उद्धार गर्ने क्रममा ३७ वटा शव फेला परेका छन्। नेपाली सेनाका अनुसार उद्धार टोलीले घटनाको ११औँ दिन एक चिनियाँ नागरिकलाई जीवितै उद्धार गर्न सफल भएको छ।
शुक्रबार संसदीय विशेष समितिको बैठकमा जानकारी दिँदै नेपाली सेनाका सहायक रथी सुवासजंग थापाले ९.७ किलोमिटर लामो सुरुङभित्र उद्धार कार्य निकै जोखिमपूर्ण रहेको बताए।
उनका अनुसार सुरुङभित्र हिलो, पानी र अक्सिजनको अभावका कारण उद्धारमा कठिनाइ भएको थियो। नेपाली सेना, चिनियाँ तथा कोरियन टोलीले संयुक्त रूपमा खोजी अभियान सञ्चालन गरेका थिए।
पावरहाउस क्षेत्रमा कार्यरत १२० देखि १३० कामदारमध्ये ११० जनालाई ४८ घण्टाभित्र हेलिकप्टरबाट उद्धार गरिएको थियो। सुरुङभित्र करिब १ हजार ७०० मिटर प्रवेश गरी खोजी गर्दा ३७ शव फेला परेका हुन्।
११औँ दिन जीवित उद्धार गरिएका चिनियाँ नागरिकले हेलमेटमा पानी जम्मा गरेर पिउँदै सुरुङभित्र समय बिताएको प्रारम्भिक जानकारी प्राप्त भएको थापाले बताए।
सुरुङको करिब चार किलोमिटर क्षेत्रमा पानी र लेदो जमेकाले थप खोजी कार्य चुनौतीपूर्ण बनेको छ। उद्धारका लागि नेपाली सेनाका ४२ जना जनशक्ति परिचालन गरिएको छ भने खोज तथा उद्धार कार्य जारी रहेको छ।
