काठमाडौं, २९ असोज । नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले उत्पादन वृद्धि, पर्याप्त आम्दानी हुने रोजगारी र नागरिकको जीवनस्तर सुधारलाई समृद्धिको मुख्य आधार बनाउनुपर्ने बताएका छन् ।
बिहीबार पार्टी केन्द्रीय कार्यालय च्यासलमा एमालेको नीति अध्ययन तथा अनुसन्धान प्रतिष्ठानको वेबसाइट सार्वजनिक गर्दै ओलीले गरिबी अन्त्य र विपन्नतालाई समृद्धिमा बदल्ने गरी नीति निर्माण गर्नुपर्ने बताए ।
उनले रोजगारी सिर्जना गर्दा काम गरेको समयभन्दा त्यसबाट प्राप्त हुने आम्दानी महत्त्वपूर्ण हुने उल्लेख गर्दै नागरिकलाई आर्थिक रूपमा सुरक्षित बनाउने अवसर उपलब्ध गराउनुपर्ने धारणा राखे ।
ओलीले जात, वर्ग र समुदायका आधारमा विभेद नगरी सबै नागरिकलाई समान प्राथमिकतामा राख्नुपर्ने बताए । प्रत्येक नागरिकको गाँस, बास, कपास, शिक्षा र स्वास्थ्यमा पहुँच सुनिश्चित गर्नु राज्यको दायित्व भएको उनको भनाइ थियो ।
उनले सत्य, न्याय र समानतामा आधारित नीतिबाट मात्रै समग्र समाजको उत्थान र दिगो समृद्धि सम्भव हुने बताए ।
