काठमाडौं, २६ असोज । गृहमन्त्री सुधन गुरुङ बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास बिमस्टेक को गृहमन्त्रीस्तरीय बैठकमा सहभागी हुन सोमबार भारतको नयाँदिल्ली प्रस्थान गरेका छन् ।
गृहमन्त्रीको सचिवालयका अनुसार दुई दिने भारत भ्रमणका क्रममा गुरुङले असोज २७ गते नयाँदिल्लीमा आयोजना हुने बिमस्टेक गृहमन्त्रीस्तरीय बैठकमा सहभागिता जनाउनेछन् ।
क्षेत्रीय सुरक्षा र सदस्य राष्ट्रबीचको सहकार्यलाई केन्द्रमा राखेर आयोजना हुन लागेको उक्त बैठकमा बिमस्टेकका सदस्य राष्ट्रका गृहमन्त्री तथा प्रतिनिधिहरू सहभागी हुने कार्यक्रम छ ।
भारतीय गृहमन्त्री अमित शाहको पहलमा आयोजना हुन लागेको बैठकमा सदस्य राष्ट्रबीच सुरक्षा क्षेत्रमा आपसी समझदारी र सहकार्यका विषयमा छलफल हुने अपेक्षा गरिएको छ ।
भ्रमणका क्रममा गृहमन्त्री गुरुङले आफ्ना भारतीय समकक्षी अमित शाहसँग द्विपक्षीय भेटवार्तासमेत गर्ने कार्यक्रम रहेको छ । उक्त भेटमा नेपाल-भारतबीचको सुरक्षा सहकार्य र आपसी हितका विषयमा छलफल हुन सक्नेछ।
दुई दिने भ्रमण पूरा गरी गृहमन्त्री गुरुङ असोज २८ गते स्वदेश फर्किने कार्यक्रम छ । गृहमन्त्रीको जिम्मेवारी सम्हालेपछि उनको यो पहिलो विदेश भ्रमण हो ।
