जनकपुर, २६ असोज । बडादसैँअन्तर्गत नवरात्रको दोस्रो दिन आज देशभरका दुर्गा मन्दिर तथा घरघरका पूजास्थलमा ब्रह्मचारिणी देवीको विधिपूर्वक पूजा-आराधना गरिँदैछ।
नवरात्रको पहिलो दिन घटस्थापना गरी जमरा राखिएको थियो भने शैलपुत्री देवीको पूजा गरिएको थियो। आज दोस्रो दिन ब्रह्मचारिणी देवीको आराधना गरिँदैछ।
नवरात्रका नौ दिनसम्म दुर्गा सप्तशती (चण्डी), श्रीमद्देवी भागवत लगायत धार्मिक ग्रन्थ पाठ गर्ने परम्परा छ। देवीको पूजा–आराधना गरेमा शक्ति, ऐश्वर्य र ज्ञान प्राप्त हुने धार्मिक विश्वास रहिआएको छ।
आश्विन शुक्ल प्रतिपदादेखि नवमीसम्म मनाइने नवरात्रमा देशभरका शक्तिपीठमा भक्तजनको चहलपहल बढेको छ। आज पनि विभिन्न देवी मन्दिरमा दर्शन तथा पूजाआराधना गर्ने श्रद्धालुको भीड लागेको छ।
नवरात्रमा चढाइएको प्रसाद विजयादशमीदेखि कोजाग्रत पूर्णिमासम्म ग्रहण गर्ने परम्परा छ।
