जनकपुर, २४ असोज । महोत्तरीको भङ्गाहा नगरपालिका-९ तत्माटोलमा दसैंको अवसरमा मनाइने मौलिक सांस्कृतिक पर्व झिझियालाई प्रोत्साहन गर्न साडी वितरण कार्यक्रम सम्पन्न भएको छ।
एमाले युवा नेता सुनिल यादवको अगुवाइमा आयोजित कार्यक्रममा मधेश प्रदेश सरकारका खेलकुद तथा समाज कल्याणमन्त्री लखन दास तत्मा प्रमुख अतिथिका रूपमा सहभागी भएका थिए।
कार्यक्रममा मन्त्री दासले मन्तव्य राख्दै झिझियाजस्ता मौलिक सांस्कृतिक परम्पराको संरक्षण र प्रवर्द्धनमा सबैले योगदान दिनुपर्नेमा जोड दिएका थिए। यस्ता सांस्कृतिक गतिविधिले समाजमा आपसी सद्भाव, एकता र सहकार्यको भावना बलियो बनाउने विश्वास व्यक्त गरिएको थियो।
कार्यक्रममा गाउँका युवा, महिला, बुद्धिजीवी तथा समाजसेवीहरूको उपस्थिति रहेको थियो। झिझिया पर्वको संरक्षण, मौलिक संस्कृतिको प्रवर्द्धन तथा सामाजिक सद्भाव र एकता कायम गर्ने उद्देश्यले साडी वितरण गरिएको आयोजकले जनाएको छ।
