काठमाडौं, १७ असोज । राष्ट्रपति रामचन्द्र पौडेलले शिक्षाले विद्यार्थीलाई ज्ञान र सीपसँगै समाज, संस्कृति, इतिहास तथा राष्ट्रप्रति सचेत र जिम्मेवार नागरिक बनाउनुपर्ने बताएका छन्।
शनिबार ललितपुरमा सेन्ट जेभियर्स स्कुल गोदावरी र जावलाखेलको ७५औँ वार्षिकोत्सव समारोहलाई सम्बोधन गर्दै राष्ट्रपति पौडेलले शिक्षाको उद्देश्य परीक्षा र प्रमाणपत्रमा मात्र सीमित हुन नहुने बताए।
उनले नेपालको भाषिक, सांस्कृतिक र सामाजिक विविधतालाई शिक्षाले सम्मान गर्दै राष्ट्रिय एकता, सामाजिक सद्भाव र सहअस्तित्वको भावना विकास गर्नुपर्नेमा जोड दिए।
आधुनिक प्रविधिको विकाससँगै समयअनुकूल पाठ्यक्रम र शिक्षण पद्धति आवश्यक रहेको उल्लेख गर्दै उनले ज्ञान, सीप, नैतिकता, अनुशासन, सिर्जनशीलता, सहकार्य, करुणा र सामाजिक उत्तरदायित्व भएका नागरिक निर्माणमा शिक्षाको भूमिका महत्वपूर्ण रहेको बताए।
स्वदेशमै उत्पादन र रोजगारीको वातावरण सिर्जना गर्ने तथा नागरिकमा देशभक्तिको भावना विकास गर्ने किसिमको शिक्षा आवश्यक रहेको उनको भनाइ थियो।
