काठमाडौं, १६ असोज । राष्ट्रिय स्वतन्त्र पार्टी (रास्वपा)का सांसद रहबर अन्सारीले वीरगञ्जस्थित नेशनल मेडिकल कलेजमा अध्ययनरत पीजी विद्यार्थीको आन्दोलनप्रति सरकारको ध्यानाकर्षण गराएका छन्।
शुक्रबार प्रतिनिधिसभा बैठकमा बोल्दै अन्सारीले विद्यार्थीहरू १० दिनदेखि आन्दोलनमा रहे पनि कलेज प्रशासनले होस्टेल खाली गर्न लगाएको र कलेज प्रवेशमा समेत रोक लगाएको दाबी गरे।
उनले कलेजले करिब २५ जना काममा नरहेका प्राध्यापकलाई ‘फेक फ्याकल्टी’ देखाएर पीजी सिट लिएको तथा चिकित्सा शिक्षा आयोगको निरीक्षणका क्रममा सुरक्षागार्डलाई बिरामी बनाएर प्रस्तुत गरिएको आरोप लगाए।
चिकित्सा शिक्षामा देखिएका यस्ता अनियमितताले विद्यार्थीको भविष्य प्रभावित हुन नहुने भन्दै अन्सारीले आन्दोलनरत विद्यार्थीका माग सम्बोधन गरी तत्काल समस्या समाधान गर्न सरकारसँग आग्रह गरे।
