बुटवल, ११ असोज। लगातारको वर्षापछि तिनाउ नदीमा आएको बाढीले शनिबार राति बुटवल उपमहानगरपालिका–११ टपमजुवाका ६ घर बगाएको छ।
नदी किनारका बासिन्दालाई पूर्वसूचनाका आधारमा सुरक्षित स्थानमा सारिएकाले मानवीय क्षति हुन पाएन। पानीको बहाव बढेपछि बिनापाते, बुद्धनगर, मजुवा र टपमजुवा क्षेत्रका सयौँ स्थानीयलाई विद्यालय तथा मन्दिरमा सारिएको थियो।
उद्धारका लागि प्रहरी, सशस्त्र प्रहरी र जनप्रतिनिधिको टोली परिचालन गरिएको थियो।
स्थानीयका अनुसार अहिले तिनाउको पानीको सतह घट्दै गएको छ। नदी किनारका क्षेत्रमा भने सतर्कता कायमै राखिएको छ।
