जनकपुरधाम, ११ असोज । देशभर मनसुनी वायु, पश्चिमी वायु तथा भारतको उत्तर प्रदेश आसपासको न्यूनचापीय क्षेत्रको प्रभाव देखिएको छ ।
हाल गण्डकी, लुम्बिनी र सुदूरपश्चिमसहित विभिन्न प्रदेशमा हल्कादेखि मध्यम वर्षा भइरहेको छ । मौसम पूर्वानुमान महाशाखाका अनुसार आज गण्डकी, लुम्बिनी, कर्णाली र सुदूरपश्चिममा वर्षाको सम्भावना बढी छ।
कोशी, बागमती, मधेसलगायतका प्रदेशमा पनि केही स्थानमा चट्याङसहित वर्षा हुनसक्ने जनाइएको छ । सुदूरपश्चिम तथा गण्डकी, लुम्बिनी र कर्णालीका केही हिमाली तथा पहाडी क्षेत्रमा भारी वर्षाको सम्भावना रहेको छ । लुम्बिनी र सुदूरपश्चिमका तराई क्षेत्रमा हावाहुरीको समेत सम्भावना छ ।
यसैबीच, अविरल वर्षाका कारण धनुषामा घर भत्किँदा एक महिलाको मृत्यु भएको छ । मिथिला नगरपालिका११, आँपगाछी चोकमा शनिबार बिहान पहिरो खस्दा टिनको छानो भएको काठको घर भत्किएको हो । घटनामा स्थानीय ४२ वर्षीया कमला श्रेष्ठको मृत्यु भएको प्रहरीले जनाएको छ ।
घर भत्किएपछि नेपाल प्रहरी, सशस्त्र प्रहरी र नेपाली सेनाको संयुक्त टोलीले जेसीबीको सहयोगमा उद्धार गरी श्रेष्ठको शव निकालेको थियो । शव पोस्टमार्टमका लागि बर्दिबास अस्पताल, महोत्तरी पठाइएको छ ।
घटनाबारे थप अनुसन्धान भइरहेको प्रहरीले जनाएको छ ।
