काठमाडौं, ११ असोज। लगातारको वर्षासँगै आएको बाढी र पहिरोका कारण देशभर १२ जनाको मृत्यु भएको छ भने ७ जना सम्पर्कविहीन छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार पछिल्लो २४ घण्टामा मात्रै ६ जनाको मृत्यु भएको हो। असोज ८ गतेदेखि बाढी, पहिरो र वर्षाजन्य विपद्मा परी १२ जनाले ज्यान गुमाएका छन्। पाल्पामा एक तथा बागलुङमा चार र म्याग्दीमा दुई जना बेपत्ता छन्।
विपद् जोखिम भएका क्षेत्रमा सुरक्षा निकाय र उद्धार टोली परिचालन गरिएको प्राधिकरणले जनाएको छ। हिमाली क्षेत्रमा भारी वर्षा र हिमपातको सम्भावनालाई ध्यानमा राख्दै ९ हजारभन्दा बढी पर्यटकलाई सुरक्षित स्थानमा ल्याइएको छ।
नवलपरासी क्षेत्रमा मात्रै १ हजार १ सयभन्दा बढीलाई सुरक्षित स्थानमा स्थानान्तरण गरिएको छ। म्याग्दीमा उद्धारका लागि दुईवटा हेलिकोप्टर परिचालन गरिएको छ भने प्रभावितलाई खाना तथा राहत सामग्री उपलब्ध गराउने काम भइरहेको छ।
प्राधिकरणका अनुसार गण्डकी र लुम्बिनीका केही क्षेत्र तथा कालीगण्डकी र नारायणी नदी बेसिनमा जोखिम उच्च छ। वर्षा अझै जारी रहन सक्ने भएकाले नदीको बहाव बढ्न सक्ने र बाढी–पहिरोको जोखिम कायमै रहेको जनाइएको छ।
