काठमाडौं, १३ भदौ । रसुवास्थित भोटेकोशी नदीमा बुधबार बिहान आएको विनाशकारी बाढीमा मृत्यु हुनेको संख्या ५५३ पुगेको छ। प्रहरी प्रधान कार्यालयका अनुसार विभिन्न जिल्लाबाट हालसम्म ५५३ जनाको शव फेला परेको हो।
सबैभन्दा बढी चितवनमा २२२ र नवलपरासी पूर्वमा १३४ जनाको शव भेटिएको छ। बाढी प्रभावित क्षेत्रबाट हालसम्म एक हजार ४७३ जनाको उद्धार गरिएको प्रहरीले जनाएको छ। घाइतेमध्ये केहीलाई उपचारका लागि काठमाडौं ल्याइएको छ भने उपचाररत र डिस्चार्ज भएका गरी ९७ जना रहेका छन्।
बाढीपछि नेपाली सेना, नेपाल प्रहरी, सशस्त्र प्रहरी बल, भन्सार तथा अध्यागमनका कर्मचारीसमेत सम्पर्कविहीन भएका छन्। हालसम्म नेपाली सेनाका ४४, नेपाल प्रहरीका २७ र सशस्त्र प्रहरीका १३ जना गरी सुरक्षाकर्मी बेपत्ता छन्। सर्वसाधारणसहित कुल दुई हजार ३८१ जना सम्पर्कविहीन रहेको प्रहरीले जनाएको छ। प्रभावित क्षेत्रमा खोजी तथा उद्धार कार्य तीव्र रूपमा जारी छ।
