काठमाडौं, ८ भदौ । पूर्वप्रधानमन्त्री डा. बाबुराम भट्टराईलाई हिन्दुविरोधीका रूपमा चित्रण गर्ने भ्रामक प्रचार भइरहेको भन्दै उनको सचिवालयले आम नागरिकलाई सचेत रहन आग्रह गरेको छ।
सोमबार विज्ञप्ति जारी गर्दै सचिवालयले पुराना भिडियो तथा अभिव्यक्ति तोडमरोड गरी सामाजिक सञ्जालमा भ्रामक सामग्री फैलाइएको जनाएको छ। साथै भट्टराईलाई धम्कीसमेत आइरहेको भन्दै संलग्न व्यक्ति तथा समूहलाई पक्राउ गरी कानुनअनुसार कारबाही गर्न सरकारसँग माग गरेको छ।
सचिवालयले धर्मनिरपेक्षता कुनै धर्मको विरोध नभएको स्पष्ट गर्दै सबै धर्म र आस्थाप्रति समान व्यवहार तथा नागरिकलाई आफ्नो आस्था रोज्ने स्वतन्त्रता सुनिश्चित गर्नु यसको मूल मर्म भएको जनाएको छ।
जातीय विभेद र सामाजिक असमानतामाथिको आलोचनात्मक बहसलाई धार्मिक घृणाका रूपमा प्रस्तुत गर्नु गलत भएको पनि सचिवालयको भनाइ छ।
