काठमाडौं, ४ भदौ । राष्ट्रिय स्वतन्त्र पार्टी -रास्वपा) का सभापति रवि लामिछानेले संवेदनशील विषयमा आरोप, आशंका वा बयानका आधारमा धारणा बनाउनुभन्दा तथ्य र प्रमाणका आधारमा बहस गर्नुपर्ने बताएका छन् ।
राज्य व्यवस्था तथा सुशासन समितिको बैठकमा बोल्दै उनले सञ्चारमाध्यममा आएका विषय, आरोप, अदालतमा विचाराधीन मुद्दा वा कसैले बयानमा नाम लिएको विषयलाई एउटै दृष्टिकोणबाट हेर्न नहुने बताए ।
लामिछानेले संवैधानिक निकाय र संस्थाको गरिमा तथा विश्वसनीयतामा असर पर्ने गरी प्रश्न उठाउन नहुने धारणा राखे। समितिमा प्रस्तुत हुने विषय तथ्य, प्रमाण, कानून र संविधानमा आधारित हुनुपर्ने उनको भनाइ थियो ।
संविधान संशोधनका लागि प्रतिनिधि सभामा मात्र दुई तिहाइ पुगेर नहुने भन्दै उनले संविधानले तोकेको प्रक्रिया पालना गर्नुपर्ने बताए। संवैधानिक निकायमा नियुक्ति गर्दा अधिकतम योग्यता र मेरिटलाई आधार बनाउनुपर्नेमा पनि उनले जोड दिए ।
उनले व्यक्तिसँगको असहमति वा विवादका कारण संवैधानिक संस्थामाथि निरन्तर प्रश्न उठाउँदा लोकतन्त्रका आधारस्तम्भ कमजोर हुन सक्ने चेतावनी दिए ।
