काठमाडौँ, २ भदौ । उच्च अदालत जनकपुरको अस्थायी इजलास वीरगन्जका न्यायाधीश गोकर्ण डाँगी सवार स्कार्पियो दुर्घटनामा घाइते भएका अन्य पाँच जनाको पहिचान खुलेको छ ।
दुर्घटनामा न्यायाधीश डाँगीसहित स्कार्पियो चालक दाङ राप्ती–८ का ३२ वर्षीय छुनिलाल चौधरी, बैतडी दशरथचन्द–७ का ५१ वर्षीय तारादत्त बडु, उनकी श्रीमती ४९ वर्षीया लक्ष्मी बडु, छोरा २५ वर्षीय रितेन्द्र बडु र दिदी ३१ वर्षीया रिता बडु घाइते भएका छन् ।
प्रहरीका अनुसार लक्ष्मीको अवस्था गम्भीर रहेको छ भने अन्य घाइतेको अवस्था मध्यम छ। उनीहरूलाई भीमफेदी अस्पतालमा प्रारम्भिक उपचार गरिएपछि थप उपचारका लागि पठाउने तयारी भइरहेको छ ।
प्रदेश ३–०१–००२ झ ५१८३ नम्बरको स्कार्पियो मंगलबार बिहान काठमाडौंबाट वीरगञ्जतर्फ जाने क्रममा दुर्घटनामा परेको थियो । सडकबाट करिब ५०–६० मिटर तल खसेपछि स्कार्पियो दुर्घटनाग्रस्त भएको प्रहरीले जनाएको छ ।
