जनकपुर, २८ साउन । मधेश प्रदेश सरकारले मन्त्रिपरिषद् पुनर्गठन गर्दै मन्त्रालयको संख्या १२ बाट घटाएर ९ कायम गर्ने तयारी गरेको छ ।
स्रोतका अनुसार दुई–तीन दिनभित्र सत्ता गठबन्धनका दलबीच सहमति गरी पुनर्गठन गरिने सम्भावना छ । मन्त्रालय घटाउँदा नेपाली कम्युनिस्ट पार्टी -नेकपा-का दुई र नेकपा एमालेका एक मन्त्रीलाई हटाउने तयारी भइरहेको बताइएको छ ।
हाल कांग्रेस, एमाले र नेकपाले चार–चार मन्त्रालय सम्हालिरहेका छन्। पुनर्गठनपछि कांग्रेसले मुख्यमन्त्रीसहित चार, एमालेले तीन र नेकपाले दुई मन्त्रालय पाउने गरी भागबण्डाको तयारी छ ।
मन्त्रालयको संख्या घटाउन अर्थमन्त्री युवराज भट्टराई नेतृत्वको कार्यदलले यसअघि ९ मन्त्रालय कायम गर्न सिफारिस गरेको थियो । विभिन्न मन्त्रालय गाभेर तीन मन्त्रालय बनाउने गृहकार्य भइरहेको छ ।
भूमि व्यवस्था मन्त्री श्यामप्रसाद पटेल नेतृत्वको अर्को कार्यदलले पनि मन्त्रालयको पुनर्संरचनाबारे प्रतिवेदन तयार गरिरहेको छ ।
