जनकपुर, १५ साउन । मधेश प्रदेशका गृह, सञ्चार तथा कानुनमन्त्री फकिरा महतोले प्रदेशमा पछिल्ला दिनमा देखिएको साम्प्रदायिक तनाव र हिंसात्मक घटनाप्रति गम्भीर चासो व्यक्त गर्दै अन्तरधार्मिक अभियन्ता तथा सर्वसाधारणलाई शान्ति, सद्भाव र सामाजिक एकता कायम राख्न अपिल गरेका छन् ।
शुक्रबार जारी गरेको अपिलमा मन्त्री महतोले समाजमा द्वेष, अफवाह, उत्तेजना वा हिंसात्मक गतिविधिमा सहभागी नहुन आग्रह गरेका छन् ।
उनले कुनै पनि उक्साहटमा नपरी संयमित रहन तथा सामाजिक सञ्जालमा भ्रामक सूचना र घृणा फैलाउने गतिविधिबाट टाढा रहन सबैलाई अनुरोध गरेका छन् ।
मन्त्री महतोले एउटा गलत कदमले समाजमा दीर्घकालीन असर पार्न सक्ने उल्लेख गर्दै आजको संयम, जिम्मेवारी र सहिष्णुताले भावी पुस्ताको सुरक्षित भविष्य सुनिश्चित गर्ने बताएका छन् ।
उनले धर्म, जाति र समुदायबीचको आपसी सद्भावलाई अझ सुदृढ बनाउन सबै पक्षको सक्रिय सहयोग आवश्यक रहेको उल्लेख गरेका छन् ।
अपिलमा उनले आफ्ना सन्तानलाई भिड होइन शिक्षा, द्वेष होइन मानवता, देश होइन सद्भाव र सहिष्णुताको बाटो रोज्न प्रेरित गरौंæ भन्ने सन्देशसमेत दिएका छन् ।
