जनकपुर, १५ साउन । सुनसरीको देवानगञ्ज घटनाको विरोधमा भएको प्रदर्शन साम्प्रदायिक तनावतर्फ उन्मुख भएपछि जनकपुरमा जारी कफ्र्यु शुक्रबार पनि कायम रहेको छ ।
बिहान दुई घण्टाका लागि अत्यावश्यक वस्तु खरिद गर्न कफ्र्यु खुकुलो बनाइए पनि त्यसपछि पुनः पूर्ण रूपमा लागू गरिएको छ । कफ्र्युका कारण जनकपुरका मुख्य सडक, बजार तथा जानकी मन्दिर सुनसान बनेका छन् ।
रामानन्द चोक, पिराडी चौक,जनक चोक, थापा चौक, भानुचौक, अस्पताल रोडलगायत क्षेत्रमा नेपाल प्रहरी, सशस्त्र प्रहरी र नेपाली सेना परिचालन गरिएको छ ।
कफ्र्युका कारण बिरामी, सर्वसाधारण तथा यात्रुहरू समेत प्रभावित भएका छन् । प्रशासनले जनकपुर उपमहानगरपालिकासहित नगराइन र लक्ष्मीनियाका केही क्षेत्रमा कफ्र्यु जारी रहेको जनाएको छ ।
