जनकपुरधाम, ६ साउन । आन्तरिक राजस्व कार्यालय जनकपुरधामले आर्थिक वर्ष २०८२/८३ मा ६ अर्ब ६ करोड ७८ लाख ८८ हजार रुपैयाँ राजस्व सङ्कलन गरेको छ ।
बजारमा आर्थिक तरलताको अवस्था रहे पनि पुरानो बक्यौता असुली र बजार अनुगमनलाई प्रभावकारी बनाइएकाले उल्लेखनीय राजस्व सङ्कलन गर्न सफल भएको कार्यालयले जनाएको छ ।
कार्यालय प्रमुख आनन्दकुमार गुप्ताका अनुसार गत आर्थिक वर्षका लागि ६ अर्ब ८५ करोड ७२ लाख ५५ हजार रुपैयाँ राजस्व सङ्कलन गर्ने लक्ष्य तोकिएको थियो। कुल लक्ष्यको ८८.४९ प्रतिशत राजस्व सङ्कलन भएको उनले बताए ।
राजस्वतर्फ सबैभन्दा बढी अन्त शुल्कबाट २ अर्ब ५५ करोड ७ लाख ३० हजार रुपैयाँ, आयकरबाट २ अर्ब ६ करोड ८२ लाख १ हजार रुपैयाँ तथा मूल्य अभिवृद्धि कर -भ्याट) बाट १ अर्ब २८ करोड ४० लाख ९९ हजार रुपैयाँ सङ्कलन भएको छ ।
त्यसैगरी ब्याज करबाट ७ करोड ७८ लाख ३ हजार, बहाल करबाट ५ करोड २५ लाख ३७ हजार, स्वास्थ्य जोखिम करबाट ४ लाख ३१ हजार तथा अन्य शीर्षकबाट ३ करोड ४० लाख ८७ हजार रुपैयाँ राजस्व उठेको कार्यालयले जनाएको छ ।
अघिल्लो आर्थिक वर्ष २०८१/८२ मा कार्यालयले ४ अर्ब ८८ करोड रुपैयाँ राजस्व सङ्कलन गर्ने लक्ष्य लिएकोमा ४ अर्ब ९० करोड रुपैयाँ सङ्कलन गरेको थियो । हाल कार्यालयमा व्यक्तिगत तथा व्यावसायिक गरी १ लाख ७३ हजार ९६८ करदाता आबद्ध रहेका छन् ।
