काठमाडौं, ४ साउन । कोलकाता बन्दरगाहबाट तेस्रो मुलुकका आयातित सामान बोकेको पहिलो कार्गो रेल तीन दिनको यात्रापछि विराटनगरस्थित एकीकृत जाँच चौकी -आईसीपी- को नेपाल कस्टम यार्डमा आइपुगेको छ ।
पहिलो चरणमा स्वस्तिक आयल इन्डस्ट्रिजका लागि ४० वटा कन्टेनर कच्चा पदार्थ ल्याइएको हो । २०८० जेठमा उद्घाटन भए पनि नीतिगत जटिलताले रोकिएको यो सेवा भारतले नियम संशोधन गरेपछि औपचारिक रूपमा सञ्चालनमा आएको हो ।
रेलमार्फत सिधै विराटनगरसम्म ढुवानी हुँदा व्यवसायीहरूको लागत करिब ४० प्रतिशतसम्म घट्ने, दोहोरो लोड-अनलोडको झन्झट हट्ने र पूर्वी नेपालको औद्योगिक तथा व्यापारिक गतिविधिमा उल्लेखनीय टेवा पुग्ने अपेक्षा गरिएको छ ।
उद्योगीहरूले भने सेवा दिगो बनाउन कस्टम यार्डको पूर्वाधार र सुरक्षित भण्डारण व्यवस्थामा सुधार आवश्यक रहेको बताएका छन् ।
