काठमाडौं, २ साउन । विभिन्न अस्पतालमा इन्टर्नसिप गरिरहेका प्रशिक्षार्थी चिकित्सक, मेडिकल अधिकृत र आवासीय चिकित्सकहरूले श्रम शोषणको विरोध गर्दै शनिबार माइतीघरमा प्रदर्शन गरेका छन् ।
युवा तथा प्रशिक्षार्थी चिकित्सकको श्रम शोषणविरुद्धको सङ्घर्ष समितिको नेतृत्वमा भएको प्रदर्शनमा उनीहरूले दैनिक १२ घण्टा र साप्ताहिक ७२ घण्टाभन्दा बढी काममा नलगाउन, हप्तामा एक दिन अनिवार्य बिदा दिन तथा ४८ घण्टाभन्दा बढी काम गराए ओभरटाइम भत्ता उपलब्ध गराउन माग गरेका छन् ।
उनीहरूले सरकारले घोषणा गरेको बढेको तलब तत्काल कार्यान्वयन गर्न, आवासीय चिकित्सकलाई अधिकृत आठौँ तहसरह पारिश्रमिक दिन र एमडी/एमएस/एमडीएस अध्ययनअघि अनिवार्य एक वर्षको कार्यअनुभवको व्यवस्था खारेज गर्न पनि सरकारसँग माग गरेका छन् ।
