सप्तरी, २३ असार । सप्तरी प्रहरीले श्रीमतीको हत्या आरोपमा करिब सात वर्षदेखि फरार रहेका एक प्रतिवादीलाई पक्राउ गरेको छ ।
पक्राउ पर्नेमा सप्तरीको बोदेबरसाइन नगरपालिका–४, सिल्हटका २५ वर्षीय रुन्जे सदाय रहेका छन् । उनीमाथि आफ्नै श्रीमती गीता देवी सदायको २०७६ पुस १७ गते राति करिब १२ बजे हत्या गरेको आरोप रहेको प्रहरीले जनाएको छ ।
घटनापछि फरार रहेका सदायलाई प्रहरीले आफ्नै घर सिल्हटमा लुकिछिपी बसेको अवस्थामा पक्राउ गरेको हो । जिल्ला प्रहरी कार्यालय सप्तरीका सूचना अधिकारी तथा प्रवक्ता प्रहरी नायब उपरीक्षक हेमराज घिमिरेका अनुसार दम्पतीबीच छोरीको जन्मपछि भएको मृत्युको विषयलाई लिएर विवाद भएको थियो ।
सोही विवादका क्रममा रुन्जे सदायले श्रीमतीको हत्या गरेको प्रारम्भिक अनुसन्धानबाट खुलेको उनले बताए । मृतक गीता देवी सदायका बुवा सुकराती सदायको जाहेरीका आधारमा कर्तव्य ज्यान सम्बन्धी मुद्दा दर्ता गरिएको प्रहरीले जनाएको छ ।
पक्राउ परेका सदायविरुद्ध सप्तरी जिल्ला अदालतबाट तीन दिनको म्याद थप गरी थप अनुसन्धान भइरहेको जिल्ला प्रहरी कार्यालय सप्तरीले जानकारी दिएको छ ।
