काठमाडौं, २२ असार । सभामुख डोलप्रसाद अर्यालले संसद्मा सांसदहरूले उठाएका समसामयिक तथा सार्वजनिक सरोकारका विषयमा जवाफ दिन सरकारलाई निर्देशन दिएका छन् ।
प्रतिनिधिसभाको सोमबारको बैठकमा कर्णाली राजमार्गमा भएको सवारी दुर्घटना, उद्धार कार्यमा भएको भनिएको ढिलाइ तथा बाढी, पहिरो र डुबानको पूर्वतयारीबारे सांसदहरूले सरकारको ध्यानाकर्षण गराएका थिए ।
त्यसपछि सभामुखले सम्बन्धित विषयमा स्पष्ट जवाफ दिन तथा विपद् व्यवस्थापनको तयारीबारे संसद्लाई जानकारी गराउन सरकारलाई निर्देशन दिएका हुन् ।
सत्तापक्ष र प्रतिपक्ष दुवैबाट विशेषगरी गृहमन्त्रीले कर्णाली दुर्घटनाबारे संसद्मा जवाफ दिनुपर्ने माग उठेको थियो ।
