धनगढी, २१ असार । बझाङको केदारस्युँ गाउँपालिका ६ स्थित त्याडीगाउँमा आपसी विवादका क्रममा एक जनाको हत्या भएको छ । घटनामा संलग्न रहेको आशंकामा प्रहरीले ६ जनालाई पक्राउ गरी अनुसन्धान अघि बढाएको छ।
मृतक स्थानीय ४२ वर्षीय मोहनबहादुर बोहरा रहेको जिल्ला प्रहरी कार्यालय बझाङले जनाएको छ । प्रहरीका अनुसार शुक्रबार साँझ भएको विवाद हिंसात्मक बनेपछि बोहराको हत्या गरिएको प्रारम्भिक अनुसन्धानबाट खुलेको छ।
जिल्ला प्रहरी कार्यालय बझाङका प्रमुख प्रहरी नायब उपरीक्षक -डीएसपी) टेकबहादुर जोराका अनुसार घटनामा संलग्न रहेको आशंकामा ६ जनालाई नियन्त्रणमा लिएर आवश्यक अनुसन्धान भइरहेको छ ।
प्रहरीले बोहराको शव गाउँ नजिकै रहेको मकैबारीमा फालिएको अवस्थामा फेला पारेको जनाएको छ। घटनापछि स्थानीय क्षेत्रमा त्रास फैलिएको छ भने प्रहरीले घटनास्थलको मुचुल्का उठाएर थप प्रमाण संकलन गरिरहेको छ।
डीएसपी जोराले घटनाको वास्तविक कारण र संलग्न व्यक्तिहरूको भूमिका खुलाउन विस्तृत अनुसन्धान जारी रहेको बताए । अनुसन्धान पूरा भएपछि घटनाबारे थप विवरण सार्वजनिक गरिने प्रहरीले जनाएको छ ।
