काठमाडौं, १९ असार। संघीय मामिला तथा सामान्य प्रशासन मन्त्रालय परिसरमा आजदेखि निजामती कर्मचारी अस्पतालको सेवा इकाई सञ्चालनमा आएको छ।
निजामती कर्मचारीलाई छिटो, सहज र कार्यस्थलमै स्वास्थ्य सेवा उपलब्ध गराउने उद्देश्यले मन्त्रालय भवनको तल्लो तलामा सेवा इकाई स्थापना गरिएको हो।
मन्त्रालयका अनुसार यस सेवामार्फत कर्मचारीहरूले सामान्य स्वास्थ्य परीक्षण, रगत परीक्षणलगायतका आधारभूत स्वास्थ्य सेवा मन्त्रालयमै प्राप्त गर्न सक्नेछन्। यसले अस्पतालसम्म पुग्नुपर्ने बाध्यता कम गर्नुका साथै निजामती कर्मचारी अस्पतालमा बढ्दो सेवाग्राहीको चाप व्यवस्थापन गर्न पनि सहयोग पुग्ने अपेक्षा गरिएको छ।
यो सेवा निजामती कर्मचारीसँगै मन्त्रालयमा सेवा लिन आउने सेवाग्राहीलाई समेत लक्षित गरिएको मन्त्रालयले जनाएको छ।
